Malaki 30, 2009

Anoai ke aloha,
 
Ma muli o ka wa loihi o ka hoouna ana aku o keia mau leka mai ka waa i ke kai uli, kai hohonu nei i ka aina, he pono ka poloke ana mai i na leka. O kala mai oukou iau.
 
O keia la no ka la mehana, a he la no hoi e holoi lole a e kaulai ai i maloo, no mka mea, puka mai ka la ma ka hikina a noke aku nei a i ka napoo o ka la. Mea maila ka hookele, ua hala akula ka ITCZ (inter-tropical convergent zone), oia hoi kahi e hui pu mau ai na makani ma luna o ka laina equator, me na makani o lalo. A he wahi maikai ole o ka ino o ka makani a me ka ua. A ma muli o keia hala ana o ka ITCZ nei, e pa mai ana ka makani koolau a e holo pono ana ka waa me ka ua ole. Pii mai nei ka hauoli o makou ma ka waa i ka ike mau ana i ka la.
 
I keia ahiahi, ua lou ia he ono, a he mahimahi. Elua makau e kauo ana, a elua ia okoa ma hookahi wa. E like me ka maamau, palai ia kekahi, ai maka ia kekahi, a e kaulai ana kekahi.
 
Ke pau ka aina ahiahi i ka ai ia, ua hooliilii na pea elua. No keia ano hana, he pono ka hoohemo ana i na pea mai ke kia aku, ka hooliilii, a me ka nakii hou. Nui keia ano hana me ka hana ana o makou a pau, eia ka, ma muli o ua hana nei, ua oi ae ka wikiwiki o ka waa, me ke kuhikuhi pololei o ka ihu o ka waa ia Hawaii.
 
Na.u, na Kaleolana