Malaki 28, 2009

E na hoa e holo ana me makou ma o ka maka heluhelu, aloha.

He wahi la maikai keia a he mau mea hoihoi a hoeleu ia makou. O kekahi, ua ike ia ekolu paha nuau o ka moana e holo ana i o a i anei, ma mua a ma hope o ka waa e lele ana. A o ka lua, ua ike ia kahi holo oeoe, he wahi aku liilii, e lele ana ma kae o ka waa. Aole o keia mea elua e lele ana a i ike ia ma hookahi manawa, o ka nuau, i ke awakea no, a o kahi oeoe, ma ke ahiahi. Ma mua o keia mau mea elua, o ka pakaki o ka malolo ma luna o ka ili o ke kai, a me na ia i lou ia na ia holo na mea i ike ia ma ka moana.

O ke kolu o ka mea hoihoi, lou ia maila he ono nui. Na.u me ke kokua hou ana o Kealoha e okioki a e hoomakaukau i ka pomaikai a Kanaloa i haawi mai ai. Ia maua no e hana ana i ka ia a maikai, kaha ihola ka opu i ike i ka mea o loko, a i nana aku ka hana, aia elua oeoe liilii i loko i hoohapalua pono ia e ka ono no e ai ana. Ma muli o ka nui o neia ia, nui na ano o ka ai ana.  Ua pokepoke ia a ai maka ia me ka hui ana o ka paakai a me ka limu kohu, ua ai maka ia me ka hoohui ole ana i kahi mea, he ano sashimi no hoi, ua lilo kahi hapa i kupa, palai ia kekahi me ka palai pu ana no hoi i na hua o loko o ka opu – he ono no, hooki kekahi i hoomaloo ma ka hope o ka waa. A o keia mau ano o ka ai ana he keu a ka ono o makou, he hapalua wale no o ka ia nui. O ka hapalua e ae, haawi ia akula i ke hoa moku o Kamahele i ia na lakou.

Helelei ka ua liilii a pa mai no hoi na kukuna o ka la no ka wa lii.  He hao makou i ka ohana ma ka aina, eia ka he maikai kekahi ka noho ana ma keia waa nei i waena konu o ka moana akea.

Na.u no, na ke kanaka noho i ka pohu lai o Konahuanui.