Malaki 27, 2009

Anoai ke aloha,
 
Hu ka hauoli o makou na holo waa, oiai, ke pa mai nei ke kukuna o ka la no ka wa mua o keia holo ana. Aole hiki ke wehewehe i ka lua ole o ka maikai o ka mehana o ka la. Akahi no a hemo mai na lakeke ua, a kau ia ma na kaula no ka hoomaloo. Eia ka, o ka po nei ea, aole pela. Ua ihola no ka hoi ka ua, me he mea la, ua komo maoli no i ke kai o kahi Uhumakaikai ma Kaena. Mea maila o kahi hoa o Kaina Holomalia, kekahi kanaka e noho ana ma ka pola ma mua pono o ko.u nana, “me he helelei ana o ka hao o Poliahu no ke anuanu o ka ua, a ke ku hoeuli e hoonana i ka moku ko, komo ka ua i ka maka me he la, o ka laau niho ka mea e komo ana.”
 
Eia nae, ma ka nana o ka mea kakau, oia hoi ka nana hola 2 – hola 6 me Kealoha, aohe ua iki. O ia ka makamua o ke ku nana me ka ole o ka ua. A eia hou, a o ka puiwa no hoi, ike ia he mau hoku o ka lewa, aole he nui loa, aka hauoli i ka ike ana i hookahi. I ka wehewehe kaiao, mea maila o anakala Bruce ka hookele, “o keia la no ka la e huli ai ka ihu o ka waa no Hawaii, e oki an ke kaula ko, a e kau ana na pea, o ka holo no ia”.   
 
Pii ae ka hoihoi, oiai e holo waa maoli ana, a oi aku ka lealea o ka holo me ke ko ole, o ka makani no e hooholo ai ka waa. Puka i waho o ka hale pea na hoa hele a pau a nana aku i ka holo o ka waa, a me ke kau ana o ka pea. Hulo, hulo, a kani akula ka pihe a haalele wale. Kau ia ka pea a hookuu ia ke aho kalewa e like me ka mau.
 
Ma mua pono o ke ku ana o ka la i ka lolo, lohe ia ke kani o ka laho lio i haki, ka mea hoi e o aku i ka lou ana i ka ia, a i nana aku ka hana i waho o ka waa, he hai pololei no ia, he ia e kauo ana ma hope. Iho ihola ke poo lawaia o Kaina Holomalia a hoomaka ia e huki i ke aho. Huki ia a huki loa a i ke kokoke ana o ka ia i ka waa, aia hoi, ike maopopo o anakala Bruce ka hookele, he au no ka ia a e lilo ana i aina a i ola hou no makou. Ao aku la o Kealoha ke poo hoomakaukau ai iau i ke ano o ke oki ana i ka ia, a lilo wikiwiki ka ia holo moana i ia na ka waha. He akamai maoli kena kanaka i na hana mea ai. O ka lilo akula no ia o kekahi hapa lua na makou, o ka poison cru, (he wahi mea ai Tahiti, he ia maka i hui ia me ka akaakai a me ka waiu niu) no ka aina awakea, a e lilo ana kekahi hapa i aina ahiahi. O ka hapalua e ae, haawi akula i ka moku hoa hele o ka waa, ia Kamahele, na lakou i ola pu lakou i ka ia.
 
He la nani e keia, pa mai ana ka la, pa mai ana no hoi ka makani, a e holo pono ana ka waa. Ma muli o keia mau mea ea, kau ia na la a pau kauna. Elua mea nui, a elua no hoi mea iki. He kakaikahi ka holo ana ma ka waa me ke kau ana o keia mau pea he eha. A eia hou, ma waho ae o keia mau maikai o neia la, ike mau ia i na holo malolo e pakaki ana ma luna o ka ili o ke kai. He kaau paha ka pakaki ana ma hookahi manawa no ia. Upu ae nei ka manao no kahi anakala hooheno o makou ea, o anakala Eddie, oiai lohe mau ia kona leo e olelo ana no ka lawaia malolo ma ka hohonu. Hoopili aku kekahi hapa o kahi mele:

Aloha no, aloha no, aloha no.
 
Oia wale no hoi no neia la e holo nei, ke manao lana nei, e mau ana ka pomaikai o makou ma keia huakai holo moana e like me na kupuna o kakou.
 
Nau, na ke kanaka wailana no ke kio nani o Keawaiki.