Malaki 24, 2009

Aloha hou e na hoa makamaka heluhelu,

Eia kahi hoa o oukou e holo ana i ka moana nui a Kila.  O ke ao uli i ike ia i nehinei, he oiaio, ua ka ua a olapa no hoi ka uila i ke ahiahi nei a hiki i keia manawa. Mau no ka piha o ka lewa i ke ao, aohe wahi la i ike ia. Ano malie ke kai, eia ka ma muli o ka ua, he anuanu a koekoe.

I ke kakahiaka nei , ua hookuu ia ke aho kawela, a he pomaikai no, loaa no kahi ia, he ahi. Pokepoke ia kekahi a hui ia me ka limu kohu a me ka inamona o Hawaii, a o kekahi hapa, e palai ia ana i keia ahiahi.
Maikai makou a pau, a e hao ana i kahi ui o Maunawili.

Na’u, na Kaleo